den grøne plassen

kunsten å vera tolmodig

gumpo55 — Sun, 19 Feb 2012 16:30:01 +0000

Ein vestlending er vane med vatn, mykje vatn. Gjennom ein vinter i vest vert du bydd vatn i mange former: vassrett, loddrett, regn, is, snø, vadlasletta, helst alle former på kort tid, dvs nokre timar. På denne tida av året er det at eg tek til å bli litt utolmodig og lei vatn. Eg veit at eg må tola mykje vatn enno før “rogn i blomar står”, men eg kan no alltid drøyma og lengta framover mot vår; gle meg til alt som skal bløma, t.d. Are sitt “rhododenron-arboret” som dagens bilete er frå.

blomar til ein mann

gumpo55 — Sat, 11 Feb 2012 09:19:13 +0000

Litt rufsete, ujålete, velvillige og til å stola på er desse valmuene som legg under seg stadig større del av hagen vår, både innanfor og utanfor gjerdet. Dei same orda kan eg bruka om han som eg nett i dag har vore gift med i 35 år. Til lukka med dagen, du og eg <3

stakkars skjor

gumpo55 — Sat, 04 Feb 2012 12:59:46 +0000

Bestemor og Kari (4 år) sit i stova og ser ut på alle småfuglane som held fest på fuglebrettet. Bestemor er ivrig fugleven. Brått skvett alle småfuglane unna, ei diger skjor blandar seg inn i gjestebodet, ubeden! “Å, der kom den stygga skjoro,” seier bestemor, går bestemt ut på altanen og jagar henne vekk slik at småfuglane kan få plassen sin att. Då ho vel er kommen inn i stova, ser Kari på henne, og seier: “Når EG blir stor, skal ALLE fuglane få mat.” Sidan har ingen hos oss jaga skjora bort frå fuglamaten.

Søndagsgjester

gumpo55 — Sun, 29 Jan 2012 14:16:37 +0000

Dei er ikkje kravstore, søndagsgjestene mine i dag. Eg slepp unna med å servera to-rettars middag: Gammalt julanek og solsikkefrø.

Winter Wonderland – tribute to Alec

gumpo55 — Sun, 22 Jan 2012 15:08:55 +0000

Snøen, skogen, himmelen, veden, elva – og eg. Betre kan ein knapt ha det, dersom ein er glad i snø, då. Søndag i Tveitedalen kan anbefalast på det sterkaste.

Adam Hiorths veg

gumpo55 — Fri, 20 Jan 2012 20:19:06 +0000

God bok for ein turelskar og andre:Brit Bildøen si siste bok er eit funn for den som likar seg ute under open himmel. Her møter du den aldrande miljøvernaren Jon, som syklar landet vårt på tvers, med ein ung filmskapar, Adam, på slep. Nydelege naturskildringar og mykje humor i salig blanding, les, les…..

Red in the morning…..

gumpo55 — Sun, 15 Jan 2012 10:30:23 +0000

“Red in the morning, sailor’s awarning” – står det i handboka mi for båtfolk. Det bryr eg ikkje det minste om, for båten ligg trygt på låven, og eg vil nyta dei sjeldne raude soloppgongane me er velsigna med denne vinteren. Her gjer måsen seg klar til frukost i laksamerdane, og hegren siglar høgt innover, truleg på veg til dagposten sin i Opsangervatnet.

Gråvêrstur til Gråskallen

gumpo55 — Sat, 07 Jan 2012 18:48:32 +0000

“Vera med på tur t Gråskallen?” let sms-en frå naboen i dag føremiddag. Regntjukke skybankar låg i vest, men me let det stå til. Turen gjekk via Onarheimslio på glatt og vått føre, men desse konene har vore ute før og er enno mjuke i steget Kvilebenk, dersom det ikkje hadde vore så vått.Det var heller dårlig sikt på toppen, og turen gjekk raskt nedover i retning Langgåt.Vakkert, på eit høgdedrag nedanfor Gråskallen ligg ei pittelita jakthytte, høveleg til ein tørr pause.Endeleg kom sola fram eit øyeblikk, og strødde gull over Bogsnes-neset og Husnesfjorden.

GODT NYTT ÅR!

gumpo55 — Sun, 01 Jan 2012 11:34:35 +0000

- og godt nytt turår, anten du skal kort eller langt! Mine turar går for det meste i nærmiljøet, og her ligg mange uoppdaga turmulighetar og ventar. Halsnøy ligg rett utanfor stovevindauga mitt, men er “nytt terreng” for meg. Det skal eg gjera noko med i året som kjem. Har alt starta med tur til Toftåsen, ein nytelse i grøn vinter:Grøne, små vestlandsbakkar omringa av skog og spennande hidlarar.Flate bakkar finst knapt i dette området.Mykje himmel over Halsnøy, lyset blir spesielt fint.Ikkje så mange og lange motbakkar på øya, her har ein god hjelpar likevel vore i sving. Då er det berre å seia GOD TUR inn i det nye året!

tidenes bursdagsgåve

gumpo55 — Wed, 28 Dec 2011 16:19:03 +0000

Julaftan vart eg for første gong nærare 60 enn 5o år i tal. Nokon her i huset meiner at eg etter kvart er blitt skøytalaus med bruken av tende stearinljos. Kvar kveld må nokon ta ein runde både inne og utomhus for å sjå om eg har tende ljos på stader eg har gløymt (seier nokon). Difor fann nokon på å gje meg kunstige led stearinljos til bursdagen min; dei styggaste stearinljosa eg har sett! Det hjelper ikkje at nokon dekker fint på frukostbordet kvar morgon:Men ljosa kan då brukast til å få grøn stemning på “den grøne plassen” når det ruskar ute og fotografen helst vil vera inne.Eller kva med litt kjølig atmosfære à la Antarktis-bileta til Vebjørn Sand sidan snøen er heilt fråverande?Blir det for kaldt, skal det berre eit lite trykk på fjernkontrollen til, og du kjem straks inn i reinaste “Red-light-district”.Eller er du lei av jula alt? Nytt trykk på fjernkontrollen, og du har påskestemning i stova!Eller eg kunne ta lysa med ned på Sunde-brua, setja dei oppå kvarandre og laga ein mini-lysskulptur liknande “Samspel” oppi Askedåso på Husnes. Jau då, lysa kan koma til nytte på ulike måtar dei, men kanskje ikkje slik nokon hadde tenkt!